АНТИДИЕТА

 Драги мои,

Има повеќе од една година како не сум пишувала на блогот, но во моите мисли разговарам со вас секој ден. Во текот на оваа година многу работи се сменија, ми се отворија многу нови погледи и дојдов до многу нови знаења. Долго бев во забуна од многу конфликтини информации и ми беше потребно време да дојдам до сопствени зклучоци за вистината. Денес знаејќи повеќе знам и колку многу не знаеме за човечкото тело, за начинот на кој функционира и за начинот на кој треба да го чуваме и одржуваме во оптимална форма.

На почетокот на минатата година започнав со строг режим на интервално постење, со ОМАД секој втор ден, и два оброка во останатите денови. Овој метод се покажа многу функционален како за намалување на килограмите така и за намалување на инсулинот. Но, знаевте дека има „но“ нели, но, почнав да чувствувам притисок, се чувствував лишено и главоболките нагло ми се зголемија и зачестија. Знаев дека е време да се паузира, и за прв пат во животот решив проблемот со мигрените да го ставам на прво место и конечно систематски да се обидам да го решам. После година дена консултации со невролог, експерименти со лекарства и конечно добра дијагноза мојата мигрена ја ставив под контрола за прв пат по 30 години. Ова за мене имаше толку голем импакт што мојата тежина автоматски стана толку небитна и јас едноставно кренав раце од обиди за ослабнување.

Ја прочитав книгата „Интуитивно јадење“ од Елис Ресч и Евелин Трибол и за прв пат во животот се видов себеси од страна и со сочувство. Безброј диети, безброј изгладнувања, и огромна вина со секој залак од храната што ја сакам. Ова едноставно не е начин на кој човек кој се сака себеси, треба да се однесува кон себе. Па почнав да применувам дел од принципите на книгата и истата топло ја препорачувам. Тоа не е програм за слабеење, напротив, тоа е начин на кој можете да си опростите самите на себе и да продолжите понатаму полесно а не полесни. 

Во видеата подоле може да се запознаете со принципите опишани во книгата. Аби на лесен начин ги објеснува во неколку видеа. 

Сега после година дена дозволување на себе си да јадам кога ќе посакам, што ќе посакам. После интензивно слушање на знаците на моето тело, мислам дека конечно сум спремна да додадам здрави навики во мојата исхрана. Не диета- никако диета- за да можам да го сакам и почитувам моето тело секој ден со секој оброк. 

Што детално почнав да додавам ќе ви пишам во наредниот пост, но интервалното постење дефинитивно сеуште игра голема улога.

Се читаме...