Јануари помина и беше супер месец. Успешно вклопив 10 ОМАД дена од кои два во ден со мигрена и еден на вториот ден од циклусот. Да се надеваме дека Фебруари ќе биде уште подобар. Уште му се мислам на 36- часовниот режим, па ќе видиме дали ќе се осмелам.
Кога ќе се спомене пост, особено кога ќе се спомене ОМАД на луѓето околу вас одеднаш им станува непријатно. Тогаш почнуваат муабети од типот- тоа е гладување, штетно е, ќе се успори метаболизмот и сл. Но некако најголемиот страв доаѓа од „гладта“ и како да се издржи и преживее.
Во овој пост нема да зборувам за тоа зошто е добро постењето, тоа веќе сме го зборувале. Тука сакам да ви дадам совети за како да се справите со гладта.
Ако сакате да направите продолжен пост од 24-36 часа, започнете го денот со напиток од оцет и сол. Во голема чаша додадете една лижица јаболков оцет, и 1/4 чајна лажичка хималајска сол. Пијте полека во текот на утрото. Попладне повторете ја дозата. Напитокот има вкус на супа, и ја задоволува потребата да се вкуси нешто. Јас досега два пати сум правев постови од 72 часа (во болнички услови поради тестирање и операција) и потребата да вкусам нешто и двата пати ми беше најголем предизвик. Пијалокот воедно ќе ви го држи нивото на електролити стабилно, па нема да ви се појават главоболки или несвестица. Оцетот ќе ви помогне на повеќе начини а за тоа зборувавме тука ЈАБОЛКОВ ОЦЕТ.
Пијте природни билни чаеви. Нането, маточината, мајчината душичка. камилицата и многу други се докажано благи ублажувачи на гладта. Затоа правете си чајчиња во текот на денот и пијте си ги топли. Добро е и за душа и за тело.
Пијте горко кафе во времето во кое обично би јаделе. Пијте го топло и полека. Ова значително ќе ви ја намали гладта во периодите на покачен грелин.
Во кафете може да додадете и полномасно млеко, лажичка путер или лажичка кокосово масло, или сите три. Ова технички е прекршување на постот, но влијанието е помало од бенефициите и доколку ви помага на почетокот да издржите слободно практикувајте.
Доколку ви е многу тешко во првите денови може да испиете по една чаша супа од зеленчкук и коски. Во супата ставете зелен зеленчук, не коренест, зачини, коски и сол. Варете 2-4 часа и процедете. Складирајте ја во фрижидер до 5-6 дена, или во замрзнувач до 2-3 месеци. И ова технички е прекршуање на постот, но влијанието е помало од бенефициите. Практикувајте додека да се навикнете, а потоа обидете се и без супата.
Направете пудинг од вода и две лажици чиа семе. Овој пудинг многу ќе ве засити бидејќи чиа семето многу нараснува па ќе ви го пополни стомакот, но и ќе ви даде многу микронутриенти. Дискутабилно е дали го нарушува постот.
Фокусирајте се на работата. Постот мене ми ја зголемува продуктивноста. Секое утро правам список за работи кои треба да ги завршам, и за време на појадокот излегувам да завршам нешто надвор од канцеларијата. Нема потреба да се мачите и да ги гледате колегите додека јадат. Во текот на денот постојано си го проверувам списокот и се фокусирам на работата максимално за да не мислам на јадењето.
Правете работи во кои уживате. Прошетајте се. Прочитејте добра книга. Насликајте нешто. Исплетете џемпер. Гушнете ги децата или внуците. Гушнете си го мачорот...
Не гледајте телевизија. Рекламите се 70% за храна. Во сите филмови и серии и емисии се јаде. Ова ќе ви ја зголеми гладта.
Во моментите н слабост помислете на бројката на вагата која ќе ја видите утредента. Вие сте појаки од тоа колаченце. Верувам во вас.
Најпрвин расчистете со тоа која е целта на вашето постење. Доколку целта е намалување на тежината, на инсулинот, лечење на дијабетес тогаш приоритет е постот да се издржи на долги стази и телото постепено да се навикнува. Постењето тогаш е маратон па одредени отстапувања се дозволени. Доколку целта пак е афтофагијата, лечење на одредена автоимуна болест или антиканцерогеното дејство тогаш задржете се на строг пост само со вода и бидете спринтер.
И се разбира доколку во било кој момент ви стане лошо. Прекинете го постот веднаш. Обидете се утре пак.
Доколку пиете лекови и имате одредена дијагноза консултирајте се со вашиот лекар пред да почнете постови подолги од 16- часа.
Comments
Post a Comment
Сите коментари се добредојдени.